Follow by Email

Friday, 31 March 2017




جب   آسمان   کا  سمجھے  نہیں  اشارہ   تم 
تو پھر زمیں  کو کہاں رہ  سکے  گوارا   تم 

تمھارے   دیر  کا   سب   سے  حقیر ذرّہ  ہم 
ہمارے  چرخ   کا سب سے  حسیں ستارہ  تم 

اب  اس  کے  بعد  ہمیں  دید کی  نہیں حاجت 
نظر  کے  واسطے  ہو   آخری    نظارہ   تم 

بڑھا  کے  قربتیں    بیمار   کر  دیا   ہم   کو 
اب  آ کے  حال  بھی   پوچھو  کبھی ہمارا تم 

تمھاری  آگ  میں   جلتے  ہوئے  سراپا  ہم 
ہماری   راکھ  سے  اٹھتا    ہوا   شرارہ  تم 

تمھاری  بات  پہ  ہم  کو  ہنسیں سی آتی ہے 
ہمارا   حال    نہ    پوچھا   کرو   خدارا  تم 

ہمارے  ساتھ  سے  تم  مطمئیں   نہیں لگتے 
ہمارے  ساتھ  میں  کرتے  تو  ہو گزارہ   تم 
منیش شکلا 

Tuesday, 28 March 2017


آنکھوں   کو پر  نم   حسرت  کا  دروازہ   وا  رکھا   ہے
 اپنے   ٹوٹے  خواب  کو  ہم  نے  اب  تک  زندہرکھا ہے 



   عشق  کیا  تو  ٹوٹ  کے جی بھر نفرت کی تو شدّت سے 

  اپنے   ہر   کردار  کا   چہرہ   ہم   نے  اجلا   رکھا   ہے 



   جو آیا  بازار  میں  وہ  بس  جانچ  پرکھ  کر  چھوڈ  گیا 

  ہم نے خود  کو سوچ  سمجھ  کر تھوڑا مہنگا  رکھا  ہے



   تھا   اعلان   کہانی  میں    اک   روز  ندی   بھی  آےگی 

  ہم   نے  اس  امید  میں اب تک  خود  کو پیاسا رکھا ہے 



   ہم  کو ہر چہرے کے پیچھے سو سو چہرے دکھتے ہیں 

   قدرت  نے  آنکھوں  میں  جانے  کیسا  شیشہ  رکھا ہے 



   اکثر   شیریں   کی   چاہت   نے  کوہ  کنی   کروائی  ہے 

  اکثر  پربت   کے   سینے  پر  ہم   نے   تیشہ   رکھا  ہے

  

    ہم  کو  اب   خود  رستہ   چل  کر  منزل   تک  پہنچاےگا  

   کاندھوں  پر  سورج  ہے  اپنے سر  پر  سایہ  رکھا  ہے 



    ہم  سے  باتیں  کرنے  والے  الجھن میں پڑ  جاتے  ہیں 

   ہم  نے   اپنے   اندر  خود  کو  اتنا    بکھرا   رکھا   ہے 



   تم  نے  لہجہ  میٹھا  رکھ   کر  تیکھی  باتیں   بولی  ہیں

   ہم  نے  باتیں  میٹھی  کی  ہیں   لہجہ   تیکھا   رکھا  ہے



    دنیا   والوں  نے  تو   پوری  کوشش   کی  ٹھکرانے  کی 

    لیکن  اپنی  ضد  میں  ہم  نے  خود  کو   منوا  رکھا   ہے
منیش شکلا

Wednesday, 1 March 2017


لغزش    کا    اعلان   کیا   ہم   دونوں    نے 
جرم    عظیم ا لشان    کیا    ہم   دونوں   نے

اک   دوجے   کو  آخر   حاصل  کر    بیٹھے 
خود   اپنا   نقصان    کیا   ہم    دونوں    نے 

دنیا  جس  رستے   کو   مشکل   کہتی  تھی 
وہ   رستہ   آسان    کی    ا ہم   دونوں   نے 

پہلے   سنّاٹوں    کی    محفل   لگتی    تھی 
صحرا    کو   ویران   کیا  ہم    دونوں   نے 

لوگ   ہمیں  اغیار   سمجھتے  تھے   شاید 
لوگوں    کو   حیران   کیا   ہم   دونوں   نے 

قربانی    کا   مطلب    بھی   معلوم   نہ  تھا 
خود  کو  جب   قربان   کیا  ہم   دونوں   نے 

دانائ    سے   عشق    کہاں    ہو  پاتا   ہے 
خود  کو  کچھ  ناداں   کیا   ہم   دونوں   نے 

  اک   دوجے    کو   ا ک  لمحے  میں تول  لیا  
آنکھوں    کو   میزان   کیا   ہم   دونوں   نے 

ہونٹوں    کو  اک نئی    کہانی    بخش   گئے 
دنیا   پر   احسان     کیا   ہم      دونوں   نے 
منیش شکلا