دل  برہم  کی  خاطر  مدّعا   کچھ   بھی  نہیں  ہوتا 

 عجب  حالت ہے اب شکوہ  گلا کچھ بھی نہیں ہوتا 

کوئی  صورت ابھرتی ہے نہ میں مسمار ہوتا ہوں 

میں  وہ پتھر کہ جسکا فیصلہ کچھ بھی نہیں ہوتا 

کسی  کو  ساتھ  لے لینا  کسی  کے ساتھ  ہو لینا 

فقیروں  کے  لئے  اچھا  برا  کچھ بھی نہیں ہوتا 

کبھی چلنا مرے  آگے  کبھی  رہنا  مرے  پیچھے  

 رہ  الفت  میں چھوٹا  یا  بڑا  کچھ بھی نہیں ہوتا 

کبھی  دل  میں مرے تیرے سوا ہر بات ہوتی ہے 

کبھی دل میں مرے تیرے سوا کچھ بھی نہیں ہوتا 

وہی  ٹوٹی  ہوئی  کشتی  وہی  پاگل  ہوائیں  ہیں 

ہمارے  ساتھ  دنیا  میں  نیا کچھ بھی نہیں ہوتا 

یہ سودا ہے نگاہوں کا تجارت دل کی ہے لیکن 

محبّت  میں  خسارہ  فایدہ  کچھ  بھی نہیں ہوتا 

کبھی  دو  چار قدموں کا سفر طے ہو  نہیں پاتا 

کبھی میلوں سے لمبا فاصلہ کچھ بھی نہیں ہوتا 

فقط   کردار  کا  مارا ہوا   ہے   ہر   بشر  ورنہ 

کوئی  انسان  اچھا  یا  برا  کچھ بھی  نہیں  ہوتا 

فلک  پر   ہی  ستاروں  کا  کوئی عنوان  ہوتا  ہے 

کسی    ٹوٹے ستارے  کا پتا  کچھ  بھی نہیں ہوتا 

بھلے خواہش کروں تیری کسی بھی شکل میں لیکن 

مرا   مقصد  پرستش  کے سوا کچھ بھی نہیں ہوتا 

اگر دیکھوں تو خامی ہی دکھائی دے ہر اک شے میں 

اگر سوچوں تو خود  سے بدنما  کچھ بھی  نہیں ہوتا 

بظاھر  عمر  بھر  یوں  تو  ہزاروں کام  کرتے ہیں 

حقیقت  میں  مگر  ہمنے  کیا کچھ  بھی  نہیں ہوتا 

منیش شکلا