جینے سے انکار کیا جاتا ہے کیا ؟
خود سے اتنا پیار کیا جاتا ہے کیا ؟
نقش تراشی کی کاوش تسلیم مگر
خود کو یوں مسمار کیا جاتا ہے کیا ؟
ایک مکمّل دشت نوردی کافی ہے
کار جنوں ہر بار کیا جاتا ہے کیا ؟
عشق مرض اچھا تو ہے لیکن خود کو
اس درجہ بیمار کیا جاتا ہے کیا ؟
چاہت کا اظہار ضروری ہے پھر بھی
چاہت کا اظہار کیا جاتا ہے کیا ؟
آگ کا دریا آگ کا دریا ہوتا ہے
آگ کا دریا پار کیا جاتا ہے کیا ؟
لہجے میں کچھ دھار ضروری ہے لیکن
لہجے کو تلوار کیا جاتا ہے کیا ؟
جس لمحے سے صدیوں کی توفیق ملے
وہ لمحہ بیکار کیا جاتا ہے کیا ؟
دنیا ہے در اصل سرابوں کا میلا
میلے کو گھر بار کیا جاتا ہے کیا ؟
منیش شکلا
No comments:
Post a Comment